Amazon styður alríkislöggjöf um lögleyfingu kannabis

Í tísti á þriðjudag sagði Amazon að fyrirtækið veitti fullan stuðning við frumvarp sem myndi fjarlægja kannabis af lista yfir bönnuð efni á landsvísu. States Reform Act var lögð fram í nóvember síðastliðnum og ef hún nær fram að ganga, verður kannabisplöntan og virku efnin hennar meðhöndluð á svipaðan hátt og áfengi.

Þessi netverslunar-risi hefur lengi talið banni við kannabis úrelta stefnu. Í september í fyrra tilkynnti fyrirtækið að það myndi ekki lengur skima starfsmenn sína fyrir kannabisnotkun, sem varð hvetjandi dæmi fyrir önnur stórfyrirtæki til að hætta við kannabisskimanir hjá nýráðningum. Amazon hefur einnig varið milljónum dollara í að beita sér fyrir sambandsréttarbreytingum varðandi kannabis.

Ríkin ráði sér sjálf um kannabisstefnu

Samkvæmt þessu nýja frumvarpi, sem þingkonan Nancy Mace lagði fram, verður ólögleg staða plöntunnar og geðvirkra efna hennar afnumin á landsvísu, en einstök ríki mega þá sjálf ákveða sína stefnu.

Í þeim fylkjum sem þegar hafa lögleyft lyfja- eða tómstundanotkun kannabis mun iðnaðurinn ekki lengur þurfa að óttast ákærur á alríkisvísu. Önnur ríki geta ákveðið hvort þau halda banninu áfram eða enda það. Ef þau samþykkja lögleyfingu, koma engar aðrar takmarkanir af hálfu alríkisins nema lágmarksaldur upp á 21 ár og 3% virðisaukaskattur á sölu kannabis.

Repúblikanar á bak við kannabisumbætur? Það er nýtt!

Þetta er ekki fyrsta frumvarpið sem bandarískir þingmenn leggja fram í þeim tilgangi að lögleyfa kannabis á landsvísu. Það sem er sérstakt núna er að allir höfundar frumvarpsins eru Repúblikanar.

Almennur stuðningur við umbætur hefur verið mikill í mörg ár, en þingmenn og öldungadeildarþingmenn hafa ekki verið tilbúnir að fylgja vilja kjósenda sinna og Repúblikanar hafa jafnan dregist aftur úr Demókrötum í skoðanakönnunum. Einnig hafa öll fyrri frumvörp sem stefndu að lögleyfingu kannabis runnið út í sandinn vegna mikillar andstöðu Repúblikana.

Sú staðreynd að nýjasta frumvarpið er lagt fram af Repúblikönum og er jafn viðamikið og þau sem Demókratar hafa sett saman er sterkasta vísbendingin um að nú gæti eitthvað breyst. Árið 2012 ruddi Colorado fylki brautina að lögleyfingu kannabis með því að leyfa tómstundanotkun þess, og það er ekki fjarstæðukennd hugmynd lengur að í næsta áratug gæti allt landið fylgt í kjölfarið.