Делавер, САД, наскоро може да ја легализира рекреативната канабис

На 12 мај, Сенатот на Делавер го изгласа законот за легализација на возрасната употреба на канабис. Овој потег доаѓа само недела дена откако законот помина во Претставничкиот дом. Сега, останува на гувернерот Џон Карни да одлучи дали ќе го потпише документот. Тој јавно изрази спротивставување, но се додека не става вето, законот ќе стапи на сила – потпишан или не.

House Bill 371 ги отстранува сите казни за рекреативна употреба на марихуана и дозволува легално поседување до една унца цвет. Возрасните исто така ќе може да ја пренесат истата количина на други возрасни. Казните за оние под 21 година остануваат, како и за користење на марихуана на јавен простор или возење под нејзино влијание. Поседувањето повеќе од една унца ќе се казнува со парична казна од 575 долари или до 3 месеци затвор.

Законот за рекреативна марихуана одамна се подготвува

Првиот обид за легализација на рекреативната марихуана преку законодавен процес во Делавер беше во 2018 година. Тогаш не успеа главно затоа што предложи не само укинување на казните за индивидуални корисници, туку и воспоставување регулиран пазар на марихуана во државата. Бидејќи ова бара буџетски трошоци, ваквите закони мора да добијат три петтини мнозинство.

Спонзорите на новата иницијатива, предводени од пратеникот Ед Осиенски, Д-Њуарк, одлучија ова предлог-законско решение да го поделат во два одделни закони. Едниот кој ги третира личното поседување и употреба, кој бара само обично мнозинство, успешно помина во двата дома. Другиот, кој се однесува на создавање регулиран пазар за возрасна (adult-use) марихуана, сè уште се разгледува и ќе се одлучи до 30 јуни.

Повеќе пречки на патот

Гувернерот на Делавер, Џон Карни, не ја поддржува легализацијата и може да стави вето на законот. Дополнително, сенаторот Треј Паради, Д-Довер, спонзор на законот во Сенатот, кажа дека мора да се усвои и пропратниот закон за создавање легална индустрија за канабис. Во спротивно, тој ќе инсистира гувернерот да стави вето на House Bill 371.

Досега, рекреативната марихуана е легализирана во 18 американски држави плус Вашингтон ДЦ и Гуам. Во поголемиот дел од случаите, иницијативите беа одобрени преку државни референдуми. Во неколку држави, како Конектикат и Илиноис, релевантните закони беа предложени и усвоени од законодавните тела.