Нов правен удар заканува да ги затвори клубовите за канабис во Барселона

Околу 200 клубови за канабис во вториот најголем град во Шпанија се подготвени да ги затворат своите врати и да продолжат понатаму по судската одлука која ја направи нивната работа нелегална.

Шпанија, најпопуларната туристичка дестинација во Европа, секоја година привлекува меѓу 6.5 и 12.5 милиони љубители на канабис кои доаѓаат да уживаат во тревата легално. Или скоро легално. Познатиот модел на клубовите за канабис во земјата функционираше во сива зона бидејќи законот во Шпанија, а особено во Каталонија, досега дозволуваше возрасни да консумираат трева зад затворени врати.

Зошто воопшто клубовите за канабис беа легални во Шпанија?

Постои закон донесен од парламентот на Каталонија кој го признава рекреативното користење на канабис од возрасни како нивно основно право. А бидејќи законот дозволува приватна консумација, дозволува и употреба на канабис во групи.

Првично, клубовите за канабис требаа да бидат такви затворени групи каде некои членови одгледуваат канабис што ќе биде консумиран и од другите членови. Но, двосмисленоста на законот создаде дупка поради која ваквите приватни клубови станаа обични барови каде возрасни слободно можеа да купат членска карта. Членарината беше само 10 € (11,8 $), а понекогаш се користеше и за прва набавка.

Како резултат на тоа, клубовите за канабис се проширија низ многу провинции во Шпанија, најмногу во Каталонија, а нејзиниот главен град Барселона беше дом на речиси 70% од каталонските ‘asociaciónes’.

Најсериозен удар во низа неуспеси

Ерик Асенсио, портпарол на CatFac, Федерацијата на асоцијации за канабис на Каталонија, изјави дека повеќето асоцијации знаеле дека некогаш ќе мора да ги запечат своите простории. Се започна во 2017 година кога Врховниот суд го поништи законот кој дозволуваше постоење на клубови за канабис.

Извесно време, клубовите во Барселона продолжија да работат според градската регулатива, но неодамнешната судска одлука става крај на тоа бидејќи, според судијата, локалните власти не се надлежни да донесуваат закони за прашања што се државна прерогатива.

Причината за ваквата реакција можеби е тоа што дел од асоцијациите станаа големи бизниси, насочени кон туристи и понекогаш набавувајќи канабис од источноевропски и други криминални групи.

Од друга страна, градските власти и полицијата признаваат дека пионерскиот модел на Шпанија со социјалните клубови ја намали продажбата на улица и насилниот криминал што е поврзан со тоа. Како и да е, властите сега се спремаат да започнат со инспекција на клубовите во Барселона, „почнувајќи со оние со најнегативно влијание и кои се насочени кон туристите и масовната продажба“.